५ फागुन, काठमाडौं । नेपाी कांग्रेसका सांसद राजेन्द्र बजगाईंले संघीय संसद् भवनको निर्माण सुस्त रहेको भनेर सभामुख देवराज घिमिरेकै ध्यानाकर्षण गरेका छन् ।
सिंहदरबार परिसरभित्रै संसद् भवन बनिरहेको छ । तर, निर्माण कार्य निकै सुस्त रहेको गुनासो आइरहेको छ । प्रतिनिधिसभाको सोमबारको बैठकमा सभामुखको ध्यानाकर्षण गराउँदै उनले भने, ‘निर्माणाधीन संसद् भवन कहिले बन्छ ?’
अहिले सदन चलिरहेको भवन भाइब्रेन्ट नरहेको र कक्षाकोठा जस्तो रहेको उनले बताए । यसमा पनि सभामुखको ध्यान आकृष्ट हुन आवश्यक रहेको उनले भनाइ छ ।
मुलुकको प्रशासनिक केन्द्र सिंहदरबारभित्रै बनिरहेको संघीय संसद् भवन निर्माणको काममा ढिलासुस्ती भएको भनेर संसद्मा अन्य सांसदहरूले समेत आवाज उठाउँदै आएका छन् ।
सभामुख देवराज घिमिरेले पनि नयाँ संसद् भवनको निर्माणस्थल पुगेर समय समयमा अवलोकन गरिरहेका छन् ।
१ असोज २०७६ मा तत्कालीन प्रधानमन्त्री केपी शर्मा ओलीले संसद् भवनको शिलान्यास गरेका थिए । त्यसको १६ दिनपछि ६ अर्ब ९२ करोड रुपैयाँमा निर्माण सम्झौता भएको थियो ।
सम्झौताअनुसार १५ असोज २०७९ मा संसद् भवन तयार भइसक्नुपर्ने थियो । तर, अझै निर्माण सकिएको छैन ।