जिल्लाको पश्चिमी व्यापारिक केन्द्र कटारी बजारबाट ठूलो परिमाणको लागूऔषधसहित सात जना पक्राउ परेका छन्। इलाका प्रहरी कार्यालय कटारीबाट खटेको टोलीले मङ्गलबार कटारी नगरपालिका ४ कान्छी बजारबाट लागूऔषध र नगदसहित पक्राउ पर्ने ७ मध्ये एक जना किशोरी पनि छिन्।
प्रहरीले कटारी नगरपालिका ७ बस्ने वर्ष २९ का हरिबहादुर तामाङ, कटारी ८ बस्ने वर्ष १९ का भक्तबहादुर तामाङ, सोही वडाका वर्ष २५ का सोमकृष्ण राईलाई पक्राउ गरेको जनाएको छ। त्यस्तै कटारी ४ का २३ वर्षीय अनमोल मगर, ४ कै २० वर्षकी आरती राउत, सोही वडा बस्ने वर्ष २३ का सरदकुमार सुनुवार र ४ कै १९ वर्षीय बिक्रम साशंकार रहेका छन्।
उनीहरूको साथबाट प्रहरीले ट्रुपन ट्याब्लेट ४ हजार ४ सय ३१ थान, स्पासपेन ५, हजार ९ सय १२ र टेपेन्ट्रा लागूऔषध गरी जम्मा १० हजार ४ सय ६३ ट्याबलेट बरामद गरेको छ। त्यसैगरी १ सय ग्राम प्रतिबन्धित गाँजा तथा नगद २ लाख ४७ हजार ७ सय २० रुपैयाँ बरामद भएको जिल्ला प्रहरी कार्यालयका सूचना अधिकारी डिएसपी केदारमान दोङले बताएका छन्।
डिएसपी दोङका अनुसार उनीहरू सवार प्र १-०५-००१ प ७६०२ नं. को २२० सिसीको. कालो रातो रंगको पल्सर मोटरसाइकल र प्र १-०५-००१ प ७४९७ नं. को २०० सिसीको कालो फुस्रो रंगको एनएस मोटरसाइकल तथा ६ वटा मोबाइल पनि बरामद भएको छ।
कटारी कान्छी बजारमा प्रतिबन्धित लागूऔषध ओसारपसार तथा बिक्रीवितरण भइरहेको भन्ने सूचना प्राप्त भएपछि इप्रका कटारीले प्रहरी निरीक्षक भीमलाल ओलीको कमाण्डमा टोली खटाउँदा सो समूह पक्राउ परेको हो। लागूऔषध सेवन तथा कारोबारमा संलग्न ७ जना व्यक्ति, नियन्त्रित तथा प्रतिबन्धित लागूऔषध, नगद, मोटरसाइकल र मोबाइल फोन नियन्त्रणमा लिएर अनुसन्धान सुरु भएको छ।
पक्राउ परेका ७ जना व्यक्तिविरुद्ध थप अनुसन्धानका लागि बुधबार अदालतबाट म्याद लिने तयारी भइरहेको छ।
प्रकाशित: २० चैत्र २०८१ २१:०२ बुधबार