काठमाडौँ । सरकारले खेलाडीलाई पेन्सन दिने तयारी गरेको छ । सरकारको यस्तो तयारीबारे युवा तथा खेलकुदमन्त्री तेजुलाल चौधरीले जानकारी दिएका छन् ।
उनले खेलाडीहरुको भविष्य सुनिश्चित हुनेगरि रोजगारी र पेन्सनको व्यवस्थासहित राष्ट्रिय खेलकुद नीति, २०६७ संशोधन गरी मन्त्रिपरिषद्मा पठाएको बताएका छन् ।
उक्त नीतिमा खेलाडीको खेल जीवन सकिएपछि सरकारी तथा विभिन्न संस्थाहरुमा रोजगारी दिने वा निवृत्तिभरण (पेन्सन) दिने व्यवस्था उल्लेख गरिएको मन्त्री चौधरीले बताएका छन् ।
त्यस्तै, उनले खेलाडीहरुको हक र सुविधाको कार्यान्वयनका लागि खेलकुद नीति संशोधन गरिएको बताएका छन् । खेलकुदका माध्यमबाट जीविकोपार्जन गर्न नसकिएपछि खेलाडीहरु खेल क्षेत्र छोडेर वैकल्पिक पेशामा लागेको र कतिपय खेलाडी विदेश पलायन भएको भन्दै त्यसतर्फ सरकार गम्भीर रहेको पनि बताएका छन् ।