२४ माघ, काठमाडौं । अध्यादेशबारे निर्णय लिनुअघि जनता समाजवादी पार्टी नेपालका अध्यक्ष उपेन्द्र यादवले नेपाली कांग्रेसका सभापति शेरबहादुर देउवा सहितका नेताहरूसँग भेट गरेका छन् ।
नयाँ बानेश्वरस्थित संसद् भवनमा नेताहरूबीच भेट भएको हो । भेटमा जसपा नेपालका अध्यक्ष उपेन्द्र यादव र उपाध्यक्ष राजकिशोर यादव थिए । कांग्रेसबाट सभापति देउवा, महामन्त्रीद्धय गगन थापा र विश्वप्रकाश शर्मा, गृहमन्त्री रमेश लेखक उपस्थित थिए ।
उनीहरूबीच पौने घण्टा छलफल भएको थियो । छलफलमा कांग्रेस नेताहरूले अध्यादेशको पक्षमा मतदान गर्न आग्रह गरेका छन् । कांग्रेस नेताहरू अनुसार जसपा नेपाल आफूहरुको आग्रहमा सकारात्मक रहेको बताउँछन् ।
आज प्रतिनिधि सभा र राष्ट्रिय सभामा अध्यादेशहरू निर्णयार्थ पेस हुँदैछन् । प्रतिनिधि सभाको बैठक दिउँसो १ बजे र राष्ट्रिय सभाको बैठक दिउँसो सवा १ बजे बस्दैछ । जहाँ सरकारले संसद् अधिवेशन नरहेका बेला ल्याइएका अध्यादेश निर्णयार्थ प्रस्तुत गर्ने सम्भावित कार्यसूची छ ।
मन्त्रिपरिषद्को सिफारिसमा गत पुस १४ गते राष्ट्रपति रामचन्द्र पौडेलले सहकारीसम्बन्धी केही नेपाल ऐनलाई संशोधन गर्ने अध्यादेश २०८१ जारी गरेका थिए ।
पुस २९ गते थप चार वटा अध्यादेश जारी भएको थियो । माघ २ गते अर्को एउटा अध्यादेश जारी गरेको थियो । ६ वटै अध्यादेश दुवै सदनमा पेस भइसकेको छ ।
प्रतिनिधि सभामा सत्तारुढ दलको बहुमत छ । तर, राष्ट्रिय सभामा अध्यादेश स्वीकृत गर्न सरकारलाई जसपा नेपालको साथ आवश्यक छ ।