२७ माघ, काठमाडौं । नेपाली कांग्रेसले विदेशबाट फर्केकाहरुका लागि संगठित गर्ने भएको छ । नेकपा एमाले र माओवादी केन्द्रले विदेशबाट फर्केकाहरुको छुट्टै संगठन बनाएपछि कांग्रेसले पनि विभाग थपेर संगठित गर्न लागेको हो ।
पूर्व आप्रवासी समन्वय विभाग थपेर केन्द्रीय सदस्य दिनेश कोइरालाई विदेशबाट फर्केकाहरुलाई संगठित गर्न लागिएको हो । विभागले सातै प्रदेशमा भेला गरी पूर्व आप्रवासीलाई संगठित गर्ने भएको छ ।
विभागले लुम्बिनी र बागमतीमा पूर्व आप्रवासीको भेला सकेको छ भने अन्य प्रदेशमा क्रमशः कार्यक्रम राखिने विभाग प्रमुख कोइरालाले जानकारी गराए । विदेशबाट फर्केका कांग्रेसका शुभेच्छुकलाई संगठित गर्न भ्रातृ संस्थाकै रुपमा अघि बढाउनुपर्ने भेलामा धारणाहरु आएको कोइरालाले बताए ।
विभागले विदेशबाट फर्कनेहरुको तथ्यांक संकलन, संरचना निर्माण, आप्रवासीहरुको समस्या, सुझाव लगायतमा कार्य गरिरहेको कोइरालाले जानकारी गराए ।
सातवटै प्रदेशको छलफलबाट प्राप्त निश्कर्षलाई दस्तावेजका रुपमा पार्टी केन्द्रलाई बुझाउने विभाग प्रमुख कोइरालाले जानकारी गराए । विभागले लुम्बिनीको भेला १२ र १३ माघमा गरेको थियो भने बागमतीको भेला हिजो गरेको थियो ।
