काठमाडौँ । मधेश प्रदेशमा दर्ता बिनै सञ्चालन गरिएका २० अस्पताल बन्द गरिएको छ । शुक्रबार अनुगमन गरिएका २१ अस्पतालमध्ये २० वटा अस्पताल दर्ता बिनै सञ्चालन भइरहेको पाइएपछि बन्द गरिएको मधेश प्रदेशका मुख्यमन्त्री सतिशकुमार सिंहले बताएका छन् ।
उनले स्वास्थ्य तथा शिक्षा क्षेत्रमा भएका बेथिति अन्त्यका लागि अभियान नै सञ्चालन गरेर दर्ता बिना सञ्चालित अस्पताल बन्द गराएको बताएका छन् ।
विगतका सरकारले पनि यो अभियान सञ्चालन गर्ने प्रयास गरे पनि विभिन्न धम्कीका कारण काम अघि नबढेको बताउँदै आफूले ज्यानको बाजी लगाएर भए पनि अभियान सुरु गरेको र यो अभियान जारी राख्ने प्रतिबद्धता व्यक्त गरेका छन् ।
त्यस्तै, मधेश प्रदेशका ८ वटै जिल्लामा नक्कली डाक्टरले जनताको ज्यानसँग खेलवाड गरेको भेटिएको मुख्यमन्त्री शाहको भनाई छ । उनले मापदण्ड नपुगी खोलिएका अस्पतालहरुमा काम गर्ने डाक्टरहरुको एनएमसी नम्बरसमेत नक्कली भेटिएको बताएका छन् । त्यसबाहेक एम्बुलेन्स चालक र अनमी र अहेब पढेकाहरुले पनि अस्पताल सञ्चालन गरेको भेटिएको सिंहको भनाई छ । मुख्यमन्त्री सिंहले मधेश प्रदेशमा शिक्षा र स्वास्थ्य क्षेत्रमा देखिएका बेथिति अन्त्य गर्ने अभियान अब निर्वाध रुपमा अघि बढ्ने बताएका छन् ।
