२२ माघ, काठमाडौं । द एक्सेल्सियर स्कुलको आयोजनामा ११औं एक्सेल्सियर कप बुधबारदेखि हुने भएको छ । प्रतियोगितामा फाइभ ए साइड फुटसल र बास्केटबलमा प्रतिस्पर्धा हुने एक्सेल्सियरका प्रिन्सिपल प्रशान्त रजकले मंगलबार आयोजित पत्रकार सम्मेलनमा जानकारी गराए ।
ब्वाइज फुटसलमा विभिन्न ४ उमेर समूहमा खेल हुनेछ । बास्केटबलमा २ विधामा प्रतिस्पर्धा हुनेछ । फुटसलको यू–९ मा ९, यू–११ मा १४, यू–१४ मा १२ र यू–१६ मा १२ टिमले लिग कम नकआउट आधारमा प्रतिस्पर्धा गर्ने छन् ।
बास्केटबलको सिनियर ब्वाइजमा १६ तथा सिनियर गर्ल्समा १२ टिमले सहभागिता जनाउने बास्केटबल प्रशिक्षक आशिष महर्जनले जानकारी दिए ।
ग्रासरुटदेखि भविष्यका प्रतिभावान खेलाडीको पहिचान गर्ने उद्देश्यले यू–९ उमेर समूहको फुटसल पहिलोपटक समावेश गरिएको एक्सेल्सियरका खेलकुद विभाग प्रमुख महेश मल्ल ठकुरीले बताए ।
प्रतियोगिताका खेलहरु स्वयम्भूस्थित आयोजककै हातामा खेलाइने छ ।
