काठमाडौँ । सडक कब्जा गर्न खोजेपछि शिक्षक र प्रहरीबीच विवाद भएको छ । बिहीबार प्रदर्शनका क्रममा आन्दोलनरत शिक्षकहरुले बानेश्वर क्षेत्रमा तीनवटै लेन कब्जा गर्न खोजेपछि प्रहरी र शिक्षकबीच विवाद भएको हो ।
यसअघि शिक्षक आन्दोलनका लागि दुईवटा लेन छुट्याइएको थियो । अन्य लेन दुई पाङ्ग्रे सवारी साधनका लागि खुला छोडिएको थियो । तर, बिहीबार शिक्षकहरुले सो लेनसमेत कब्जा गरेर तीनवटै लेनमा आन्दोलन गर्न खोजेपछि प्रहरी र शिक्षकबीच विवाद भएको थियो । केहीबेर प्रहरी र शिक्षकबीच धकेलाधकेलको अवस्था पनि सृजना भएको थियो ।
बिहीबार शिक्षक आन्दोलनको नवौँ दिन हो । गत चैत २० गतेदेखि शिक्षकहरु विद्यालय शिक्षा ऐन जारी गर्न माग गर्दै आन्दोलनरत छन् । उनीहरुले आफ्ना मागहरु पूरा नभएसम्म काठमाडौँबाट नफर्किने अडान लिएका छन् ।
यता शिक्षक महासंघले पनि शिक्षकहरुको आन्दोलनमा ऐक्यबद्धता जनाउन देशभरका शिक्षकहरुलाई आह्वान गरेको छ । महासंघले वर्षे अधिवेशन तत्काल सुरु गर्न, विशेष अधिवेश आह्वान गर्न वा अध्यादेशमार्फत विद्यालय शिक्षा ऐन जारी गर्न सरकारको ध्यानाकर्षण गराएको छ । बाँकी तस्विरमा हेर्नुहोस्ः
