नेपाली कांग्रेसको भ्रातृ संगठन नेपाल विद्यार्थी संघ (नेविसंघ) का विद्यार्थीहरुबीच विराटनगरमा बिहीबार झडप भएको छ ।
विराटनगरस्थित महेन्द्र मोरङ आदर्श बहुमुखी क्याम्पसमा नेविसंघ आबद्ध दुई समूहका विद्यार्थीहरुबीच झडप हुँदा ३ जना घाइते भएका छन् । घाइते हुनेमा नेविसंघ मोरङका जिल्ला सभापति सरोज पोखरेल, सचिव गुड्डु साह र महेन्द्र मोरङमै अध्ययनरत नेविसंघ केन्द्रीय सदस्य पूजा विश्वास रहेका छन् ।
संस्थापन पक्ष (शेरबहादुर देउवा) र संस्थापनइतर (डा. शेखर कोइराला) पक्षका विद्यार्थीबिच झडप भएको हो । झडपमा परी घाइते भएका तीन जना इतर पक्षको रहेको बताइएको छ । घाइते तीन जनामध्ये दुई जना सामान्य रहेको र अध्यक्ष पोखरेललाई थप उपचारका लागि विराटनगरस्थित नोबेल शिक्षण अस्पतालमा भर्ना गरिएको केन्द्रीय सदस्य विश्वासले जानकारी दिइन् । दुई समूहबिच भएको झडपको भिडियो सामाजिक सञ्जालमा बाहिरिएको छ ।
दुई समूहबिच भएको झडपको भिडियोमा अध्यक्ष पोखरेलसहित तीन जनामाथि एकोहोरो आक्रमण भएको देखिन्छ । तीन जनामाथि आक्रमण भइरहँदा घरेलु हतियार बोकेर प्रस्ट देखिन्छ । महेन्द्र मोरङका स्ववियुका सभापति जसवन्त पौडेल (संस्थापन पक्ष)सहितको समूहले आफूहरू कलेजमा चुनावका बारे बुझन जाँदा आक्रमण गरेको बताउँदै, केन्द्रीय सदस्य विश्वासले भनिन्, ‘हामीहरू कलेजमा पुगेपछि उनीहरूको पौडेलसहितको ५०÷६० जनाको समूहले हामीमाथि आक्रमण सुरु गर्यो । सुरुमा मुक्का प्रहार गर्दै बन्चरो लिएर आक्रमण थाले । हाम्रो संगठनकाबारे बुझ्न कलेज गएका थियौँ ।’
स्ववियु सभापति पौडेलले भने बिना जानकारी कलेजमा नेविसंघको नयाँ इकाई गठन गर्न खोजिएपछि विवाद बढेर झडपको भएको बताए । उनले भने, ‘कलेजमा नयाँ इकाई कमिटी गठन गर्दा केन्द्रले प्रतिनिधि पठाएर गठन हुन्छ । तर, यहाँ जिल्लाले आफ्नो क्षेत्राधिकार बाहिर गएर हस्तक्षेप गर्न खोजेपछि विरोध भएको हो । यो कलेज जिल्लाले हेर्ने होइन । घटना भएका बेला आफू बाहिर रहेको र केहीबेरमा मात्रै कलेज पुगे ।’
मोरङ कलेजमा दुई पक्षबिच झडप भयो भनेर खबर आउनासाथ प्रहरीको टोली लिएर कलेज पुग्छ घटना भइसकेको बताउँदै, मोरङ प्रहरीका प्रवक्ता डिएसपी वेदप्रकाश जोशीले भने, ‘कलेज पुग्दा घटना भइसकेको रहेछ । कलेजभित्र प्रवेश नगरी बाहिरबाट घटना बुझ्दा सामान्य हात हालाहाल भएको रहेछ । दुई पक्ष हात हालाहाल हुँदा दुई पक्षका १÷१ जना सामान्य घाइते भएको बुझिएको छ । एक जना नोबेलमा भर्ना छ भने अर्का घाइतेको कुन अस्पतालमा उपचार भइरहेको छ खोज्दै छौँ । दुवै पक्षले प्रहरी कार्यालयमा घटनाको छानबिन गरी दोषीलाई कारबाही गरी पाउ भनेर निवेदन दिएका छन् । प्रहरीले घटनाको थप अनुसन्धान अघि बढाइसकेको छ ।’
प्रकाशित: १५ फाल्गुन २०८१ १७:५३ बिहीबार
#Mahendra Morang Adarsa Campus
