गत वैशाखमा बुझाएको ६ सुत्रीय माग हालसम्म पनि सम्बोधन नभएको भन्दै ध्यानाकर्षण पत्र बुझाएका हुन् ।
४ चैत, काठमाडौं । मुख्य राजनीतिक दलनिकट मजदुर संगठनले होटल एसोसिएसन नेपाल (हान) मा ध्यानाकर्षण पत्र बुझाएका छन् ।
उनीहरूले हानका प्रमुख कार्यकारी अधिकृत (सीईओ) टेकेन्द्रबहादुर महत समक्ष ध्यानाकर्षण पत्र बुझाउँदै २५ चैतसम्म अभियानात्मक कार्यक्रम सार्वजनिक समेत गरेका छन् ।
नेकपा (माओवादी केन्द्र) निकट अखिल नेपाल होटल क्यासिनो तथा रेस्टुरेन्ट माजदुर संघ अध्यक्ष कुमार पन्त, नेपाली कांग्रेस निकट नेपाल पर्यटन तथा होटल सम्बद्ध श्रमिक संघ अध्यक्ष खेमराज खड्का र नेकपा (एमाले) निकट नेपाल स्वतन्त्र होटल क्यासिनो तथा रेस्टुरेन्ट मजदुर युनियन अध्यक्ष लक्ष्मण तिवारी सहितको संयुक्त टोलीले गत वैशाखमा बुझाएको ६ सुुत्रीय माग हालसम्म पनि सम्बोधन नभएको भन्दै ध्यानाकर्षण गराएका छन् ।
हान सीईओ महतले ध्यानाकर्षण तथा अभियानात्मक पत्र बुझ्दै आफू मजदुरका विषयमा गम्भीर तथा सकारात्मक भएको भन्दै पत्र हान कार्यसमितिमा पेस गर्ने प्रतिबद्धता व्यक्त गरे ।
मजदुर संगठनहरूले १७ वर्षदेखि खाइपाइ आएको सेवा शुल्क अदालतको फैसलाबाट गुमेको, नियमित काममा नियमित श्रमिक राख्नुपर्ने सहित माग र गुनासो गर्दै आएका छन् । उनीहरूले सेवा शुल्क पुनः प्राप्तिको माग समेत गरेका छन् ।
संगठनहरूले ४ चैतदेखि देशभरि मजदुर जागरण अभियान सञ्चालन गर्ने साथै प्रधानमन्त्री, अर्थमन्त्री, श्रम तथा सामाजिक सुरक्षामन्त्री, पर्यटनमन्त्री तथा सबै दलका संसदीय दलको कार्यालयमा ज्ञापनपत्र बुझाउनेदेखि सरोकारवालासँग अन्तक्र्रिया सञ्चालन गर्ने घोषणा गरेका छन् ।
त्यसैगरी २५ चैतमा टे«ड युनियन महासंघहरूको उपस्थितिमा काठमाडौंमा मजदुर सभा गर्ने कार्यक्रम सार्वजनिक गरेका छन् ।
