सोमबारको प्रतिनिधिसभा बैठकको आकस्मिक समयमा आफ्ना कुरा राख्न खोज्दै रास्वपा सांसद सुमना श्रेष्ठ
५ फागुन, काठमाडौं । प्रतिनिधिसभा बैठक जारी छ । सोमबार बैठक सुरु हुनासाथ राष्ट्रिय स्वतन्त्र पार्टी (रास्वपा) सांसद सुमना श्रेष्ठले आकस्मिक समय माग गरिन् ।
बैठकको सुरुमै समय माग गरेर उठेकी सांसद श्रेष्ठलाई सभामुख देवराज घिमिरेले बस्न आग्रह गरे । उनी चुपचाप बसिन् । सभामुख घिमिरेले आकस्मिक समयमा बोल्न नाम टिपाएकाहरूलाई समय दिए ।
आकस्मिक समयमा सरस्वती बजिमय, रघुजी पन्त, रामकुमार राई, अशोक कुमार चौधरी, वीरेन्द्रप्रसाद महतो, सिता कुमारी राना, सूर्यबहादुर थापा, सम्झना थपलियाले आफ्ना कुरा राखे ।
यति ८ सांसदले आफ्ना कुरा राखेपछि सभामुख घिमिरेले आकस्मिक समय सकिएको भन्दै शून्य समय सुरु गर्ने बताए ।
प्रतिपक्षी बेन्चमा रहेकी सांसद श्रेष्ठले भारतको कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी) मा मृत भेटिएकी नेपाली विद्यार्थीको न्यायको माग गर्दै प्रदर्शन गरेकाहरुमाथि कलेज प्रशासनले दमन गरेकोबारे आफ्ना कुरा उठाउन खोजिन् ।
तर, सभामुख घिमिरेले समय दिएनन् ।
‘यहाँबाट समय लिएर मात्रै बोल्न पाइन्छ । आसनग्रहण गर्नुस्,’ सभामुख घिमिरेले भने, ‘यहाँलाई मैले समय दिएको छैन । तपाईं आसनग्रहण गर्नुस् ।’
सभामुख घिमिरेले नियमावलीप्रति ध्यानाकर्षण गराए ।
सांसद् श्रेष्ठ भने आफ्ना कुरा राख्ने प्रयास गरिरहिन् । भारतमा नेपाली विद्यार्थीमाथि भएको दमनबारे आकस्मिक समयमा कुरा राख्नुपर्ने उनले बताएकी थिइन् ।
भारतको कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी) मा अध्ययनरत् एक जना नेपाली विद्यार्थी होस्टलमा मृत अवस्थामा भेटिएकी छन् ।
ओडिसाको भुवनेश्वरस्थित कलेजको होस्टलमा बसेर बी–टेक तेस्रो वर्षमा अध्ययनरत बुटवलकी प्रकृति लम्साल मृत अवस्थामा भेटिएकी हुन् ।
सुमनाले सोही विषयमा सरकारको ध्यानाकर्षण गराउन सभामुखसँग समय माग गरेको बताएकी छिन् ।
तर, सभामुख घिमिरेले उनलाई फेरि भने, ‘मैले यहाँलाई समय दिएको छैन भन्ने कुरा सुन्नेगरी राखेको छु । त्यसकारण आसनग्रहण गर्नुस् । नियमको पालना गर्नुपर्छ भन्ने कुराप्रति हेक्का राख्नुस् ।’
यति कुरा राखेर सभामुख घिमिरेले शून्य समयको कार्यक्रम अघि बढाए । सांसद श्रेष्ठ बैठक कक्षबाटै निस्किइन् ।
संसद्मा आकस्मिक समय नपाएकी सांसद श्रेष्ठसँग अनलाइनखबरले गरेको छोटो कुराकानी :
मलाई पार्लियामेन्ट आउँदैगर्दा मेरो टिमबाट भारतमा भइरहेको घटनाबारे जानकारी गरायो । मैले पनि तुरुन्तै परराष्ट्रमन्त्रीको ध्यानाकर्षण गराउन भनेर आकस्मिक समय लिनका लागि गएँ ।
सभामुखको कार्यकक्षमा उहाँसँग भेट भयो । मैले भारतमा नेपाली विद्यार्थीको शंकास्पद मृत्यु भएको र त्यसको प्रतिरोध गर्दा विद्यार्थीमाथि नै दमन भएकोबारे जानकारी गराएँ ।
उहाँ (सभामुख) ले त्यो मान्छे चिन्नुहुन्छ तपाईंले ? भनेर प्रश्न गर्नुभयो । मैले नेपाली विद्यार्थीको नाम पनि भनेँ, (प्रकृति लम्साल) । उहाँले थाहा नभएको मान्छेको बारेमा बोल्न मिल्दैन भन्नुभयो । त्यसपछि मैले उहाँलाई अर्जेन्ट यसमा लाग्नुपर्छ भनेँ । तर, सभामुखले परराष्ट्रमन्त्रीको काम हो भन्नुभयो । उहाँले धेरै जनाले आकस्मिक समय लिएका छन्, तपाईं आज नबोल्नु भन्नुभयो । भारतमा विद्यार्थीलाई आजै समस्या भएको छ । अब यसबारे सभामुखले भोलिमात्रै बोल भन्नुहुन्छ ? यो कसरी हुन्छ ?
सदनमा मलाई बोल्न नदिएपछि मैले बाहिर निस्किएर केही सञ्चारमाध्यमसँग आफ्ना कुरा राखेँ । अहिले बैठककक्षमा फर्किएँ ।
