प्रधानमन्त्री केपी शर्मा ओलीले आफू भर्खर ७४ वर्षमा प्रवेश गरेको भन्दै आफू ‘बुढो नभएको’ बताएका छन्।
मंगलबार कोशी प्रदेशसभामा विशेष सम्बोधन गर्दै प्रधानमन्त्री ओलीले आफ्नो स्वास्थ्य अवस्थाबारे प्रस्ट पार्दै भने, ‘म धेरै पटक अपरेशन गरिसकेको छु, दुई पटक मिर्गौला प्रत्यारोपण गरिसकेको छु। अपरेशन गरेर बाँचिरहेको मान्छे हुँ। भर्खरै आयोजित कार्यक्रममा प्रमुख अतिथि १०१ वर्षका हुनुहुन्थ्यो। म त भर्खर ७४ लागेँ, ठिकै छु, बुढो भए भन्न मिल्दैन।’
प्रधानमन्त्री ओलीले सरकारले जनताको आवाज सुन्ने भएकाले चर्को स्वर निकाल्न आवश्यक नरहेको बताए।
उनले जनताको चाहना पूरा गर्न सरकार प्रतिबद्ध रहेको उल्लेख गर्दै भने, ‘यो सरकारलाई चर्को स्वरले केही भन्नुपर्दैन, सानो स्वरमै सरकारले सुन्छ। यो सरकार, सरकार बन्न मात्रै बनेको होइन, जनताको लागि बनेको हो।’
उनले सरकारले देशको मुहार बदल्ने अठोटका साथ काम गरिरहेको बताउँदै अनावश्यक विवादमा आफू संलग्न हुन नचाहेको उल्लेख गरे।
उनले आफ्नो संघर्षपूर्ण पृष्ठभूमिबाट देश परिवर्तनको अठोटसहित अघि बढेको बताउँदै भने, ‘म देशको मुहार फेर्ने, राम्रो कामको अगुवाइ गर्ने लक्ष्यसहित सरकारमा आएको हुँ। मलाई कुनै लफडा गर्न मन छैन, वादविवाद गर्न चाहन्नँ। म जनताको कुरा सुन्ने, जनताको लागि काम गर्ने पक्षमा छु।’
प्रधानमन्त्री ओलीले राष्ट्रिय एकताको महत्वबारे पनि जोड दिँदै भने, ‘मानिसले कहिलेकाहीं कुरा बुझ्दैनन्, त्यो छुट्टै कुरा हो। तर, म सधैं राष्ट्रिय एकताको कुरा गर्छु, किनकि यही नै देशको समृद्धिको आधार हो।’
प्रकाशित: २७ फाल्गुन २०८१ १६:४३ मंगलबार
