१७ फागुन, काठमाडौं । दक्षिण अफ्रिका आईसीसी च्याम्पियन्स ट्रफीको सेमिफाइनलमा प्रवेश गरेको छ । शनिबार भएको समूह बीको अन्तिम खेलमा इंग्ल्याण्डलाई ७ विकेटले हराउँदै दक्षिण अफ्रिका समूहविजेताका रूपमा सेमिफाइनलमा प्रवेश गरेको हो ।
तीनवटै खेलमा पराजय व्यहोरेको इंग्ल्याण्डले कुनै पनि अंक नजोडी प्रतियोगिताको अन्त्य गरेको छ । इंग्ल्याण्ड अस्ट्रेलिया र अफगानिस्तानसँग यसअघ पराजित भएको थियो ।
इंग्ल्याण्डले दिएको १८० रनको लक्ष्य दक्षिण अफ्रिकाले २९.१ ओभरमा ३ विकेटको क्षतिमा भेट्टायो । राशी भान डेर डुसेनले अविजित ७२ रन बनाउँदा हेनरिच क्लासेनले ६४ रन बनाए । इंग्ल्याण्डका जोफ्रा आर्चरले २ तथा आदिल राशिदले १ विकेट लिए ।
त्यसअघि पहिले ब्याटिङ गरेको इंग्ल्याण्डले ३८.२ ओभरमा अलआउट हुँदै १७९ रन बनाएको थियो । जो रुटले सर्वाधिक ३७ तथा बेन डकेटले २७ रन बनाएका थिए ।
दक्षिण अफ्रिकाका लागि वियान मुल्डरले ७.२ ओभरमा २५ रन दिएर ३ विकेट तथा मार्को यान्सनले ७ ओभरमा ३९ रन दिएर ३ विकेट लिए । केशव महाराजले २ तथा कगिसो रबाडा र लुंगी एंगिडिले १-१ विकेट लिए ।
योसँगै समूह बी मा दक्षिण अफ्रिकाले ३ खेलमा ५ अंक जोड्दै समूहविजेतका रूपमा सेमिफाइनल खेल्ने छ । ४ अंक जोडेको अस्ट्रेलिया पनि सेमिफाइनलमा पुगिसकेको छ ।
अब आइतबार हुने समुह ए को अन्तिम खेलपछि सेमिफाइनलमा भिड्ने टोलीको टुंगो लाग्नेछ । आइतबार भारत र न्युजिल्याण्ड खेल्दै छन् ।
भारत विजयी भएमा अस्ट्रेलियासँग सेमिफाइनल खेल्नेछ भने न्युजिल्याण्ड विजयी भएमा भारत र दक्षिण अफ्रिकाबीच सेमिफाइनल हुनेछ ।
