काठमाडौं । फिल्म ‘एक्टर : टेक वन’को अस्ट्रेलिया प्रदर्शन मिति तय भएको छ । राजन भुसाल निर्देशित फिल्मलाई इस्सा भाइब इभेन्टले ९ फागुन (२१ फेब्रुअरी)मा रिलिज गर्न लागेको हो ।
पहिलो प्रदर्शन सिड्नीमा हुनेछ । क्यानबेरासहितका अन्य राज्यमा समेत फिल्म प्रदर्शन गरिने वितरक राजजङ्ग क्षेत्रीले बताए । यसका लागि उनले पार्टी टाइम नेपालका सुरज विष्ट र अजय राजवंशीसँग सहकार्य गर्नेछन् ।
केही सहरमा रिलिज तयारी भएको र केहीले बुकिङ समेत थालेको उनले जनाए । प्रदीप खड्का, राजवल्लभ कोइराला स्टारर फिल्म अहिले नेपालमा दोसो सातामा चलिरहेको छ ।
निर्माता मोती कार्कीले अस्ट्रेलियाबाहेकका अन्य मुलुकमा प्रदर्शनको तयारी भैरहेको बताए । उनका अनुसार जापानमा ५ शो सम्पन्न भएको छ । शो थप गर्ने जानकारी आफूले पाएको उनले बताए ।
युरोपेली मुलुकमा भ्यालेन्टाइन्स डेको अवसरमा १४ फेब्रुअरीदेखि रिलिज हुनेछ । अमेरिका र क्यानडामा फेब्रुअरी १८ देखि रिलिज हुनेछ । मध्यपूर्व, बेलायत, न्यूजिल्याण्ड, मलेसिया, दक्षिण कोरिया लगायतका बजारमा मिति तय हुन बाँकी रहेको उनले जनाए ।
भारतमा भने सेन्सर प्रक्रिया सुरु भएको उनले जनाए । अधृत फिल्म्स् र अ मोती फिल्मले संयुक्तरुपमा फिल्म निर्माण गरेका हुन् ।
