नेपाल सरकारका मुख्यसचिव एकनारायण अर्यालले जलवायुजन्य हानी नोक्सानीको क्षतिपूर्ति र जलवायु न्यायको माग सगरमाथा संवादको प्रमुख विषय हुने बताएका छन्।
जेठको पहिलो साता आयोजना हुन लागेको सो तीन दिने अन्तर्राष्ट्रिय संवादको तयारीको बारेमा सञ्चारकर्मीलाई जानकारी दिन आयोजित कार्यक्रममा उनले सो जानकारी दिएका हुन।
‘हाम्रा हिमाल खुइलिएर काला बनेका छन्, जलवायु परिवर्तनका कारण खाद्यान्न संकट बढ्दो छ। यो सन्दर्भमा हामीले विश्व समुदाय समक्ष हाम्रो आवाजलाई झन् सशक्त पार्न आवश्यक छ।,’ उनले भने।
जलवायु जन्यविपत्को हिसाबले विश्वमा नेपाल अग्रिम सुचीमा रहेका कारण यो विषयको नेतृत्व नेपालले लिनुपर्ने उनको भनाइ थियो।
कार्यक्रममा परराष्ट्र सचिव अमृत बहादुर राईले नेपालको अन्तर्राष्ट्रिय उपस्थिति र छवि बढाउन संवाद महत्त्वपूर्ण हुने बताए।
उनले संवादका लागि विश्वका विभिन्न राष्ट्र प्रमुख, सम्बद्ध मन्त्री, विभिन्न निकायको प्रमुख तथा विज्ञलाई निमन्त्रणा गरिएको तर अहिल्यै को-को सहभागी हुनेछन् भनेर भन्न नसकिने बताए।
‘विदेशी पाहुनाको लागि आफ्नै प्रोटोकल हुन्छ। उचित समयमा यो जानकारी सार्वजनिक गरिनेछ’, सचिव राईले भने।
सगरमाथा संवादका सदस्य सचिव समेत रहेका वन तथा वातावरण मन्त्रालयका सहसचिव डा. महेश्वर ढकालले संवादमा उच्चस्तरीय राजनीतिक सम्मेलन, प्लेनरी, विभिन्न विषयमा समानान्तर सेसनहरू आयोजना हुने बताए।
पर्वतलाई समुन्द्रसँग जोडने विषय, हरित अर्थतन्त्र, जलवायुजन्य हानी नोक्सानीको सम्बोधन, जलवायु न्याय तथा मानवता तथा जलवायु संकट समाधानार्थ विश्वव्यापी तथा क्षेत्रीय सहकार्य लगायतका विषयमा संवाद केन्द्रित रहने ढकालको भनाई थियो।
प्रकाशित: ४ चैत्र २०८१ १४:४५ सोमबार
