काठमाडौं । कार्यकाल सकिएका चलचित्र विकास बोर्डका दुईजना सदस्य खेतुलाल बीसी र रविचन्द्र अधिकारीलाई सम्मानसहित बिदाइ गरिएको छ । मंगलबार आयोजित समारोहमा अध्यक्ष दिनेश डीसीसहितका पदाधिकारीले प्रशंसा पत्रसहित बिदाइ गरे ।
स्वदेशी चलचित्रको विकास, विस्तार, प्रवर्द्धन, संरक्षण र श्रीवृद्धिमा पुर्याएको योगदानको उच्च मूल्याङ्कन गर्दै उनीहरूलाई सम्मानसहित बिदाइ गरिएको बोर्डले जनाएको छ ।
बोर्ड अध्यक्ष डिसीले बिदाइ भएका सदस्यले स्वदेशी चलचित्र उद्योगलाई मजबुत बनाउन महत्वपूर्ण योगदान पुर्याएको बताउँदै, नयाँ सदस्यबाट पनि चलचित्र क्षेत्रको प्रवर्द्धनमा नयाँ ऊर्जाका साथ काम हुने विश्वास व्यक्त गरे ।
अर्का सदस्य राजु खत्री क्षेत्रीको कार्यकाल चैत १८ गते सकिँदैछ । स्रोतका अनुसार संचार तथा सूचना प्रविधि मन्त्रालयले मंगलबार रिक्त पदमा नयाँ सदस्यहरूको नियुक्ति गर्ने सम्भावना छ ।
मन्त्रालय स्रोतका अनुसार नयाँ सदस्यका लागि निर्माता सन्तोष लोहनी, छायांकार वीरेन्द्र भट्ट लगायतको नाम चर्चामा छ । सदस्य बन्न ५० भन्दा धेरैले लबिङ गरिरहेको जनाइएको छ ।
