२२ माघ, काठमाडौं । लेलेको अमरकान्ति माध्यमिक विद्यालय, बाँडेगाउँको बुद्ध मावि र चापागाउँको साँग्रिला स्कूल दोस्रो संस्करणको गोदावरी नगरपालिका स्तरीय अन्तर विद्यालय सेभेन ए साइड फुटबल प्रतियोगिताको क्वाटरफाइनलमा प्रवेश गरेका छन् ।
ढोलाहिटीस्थित विनायक स्पोर्ट्स कम्प्लेक्समा मंगलबारबाट सुरू प्रतियोगितामा समूह सी बाट दुई खेल जित्दै अमरकान्तिले अन्तिम आठमा स्थान बनायो । अमरकान्तिले बज्र एकेडेमीलाई २–० ले तथा बालअंकुरलाई २–१ ले हरायो ।
यो समूहको बज्र एकेडेमी दुवै खेल हार्दै प्रतियोगिताबाट बाहिरिएको छ । मंगलबारको अन्तिम खेलमा रिदभान स्कूल र बालअंकुर माविले २–२ गोलको बराबरी खेल्दै क्वाटरफाइनलको सम्भावना दुवैले कायमै राखेका छन् ।
समूह डी बाट बुद्ध मावि बाँडेगाउँले गंगा जमुना स्कूल लेलेलाई १–० ले तथा भिमसेन स्कूल देवीचौरलाई २–१ ले हराएको छ । बुद्ध मावि गत संस्करणको विजेता टोली हो । यो समूहबाट लिटिल स्टार लगातार दुई खेल हार्दै प्रतियोगिताबाट बाहिरिएको छ भने भिमसेन र गंगा जमुनामध्ये एउटा स्कूल अर्को चरणमा पुग्नेछन् ।
५ वटा विद्यालय रहेको समूह बी बाट साँग्रीला स्कूलले लगातार दुई खेल जित्दै अन्तिम आठमा पुगेको छ । साँग्रिलाले टीकाभैरबको बुद्ध माविलाई ४–१ ले तथा लेलेको सरस्वती माविलाई ३–० ले हराएको छ । सांग्रिलाका सविन चेपाङले प्रतियोगितामा ४ गोल गरिसकेका छन् ।
यो समूहमा वशिष्ठ माविले नेवा स्कूललाई २–१ ले हराउँदा बुद्ध माविले वशिष्ठलाई हराएको छ । यसैगरी नेवा स्कुल र सरस्वती स्कूलले ३–३ खेलको बराबरी खेलेका छन् ।
समूह ए बाट एभेरेष्ट इंग्लिस स्कूलले पनि क्वाटरफाइनलमा स्थान बनाएको छ । एभरेष्टले इन्द्रेणी स्कूल र सूर्य शिक्षा सदनलाई हराएको हो । इन्द्रेणीले भने टीकाभैरब बोर्डिङ स्कूलसँग बराबरी खेल्दा टीकाभैरबले सूर्य शिक्षालाई १–० ले हरायो ।
दुवै खेल हार्दै सूर्य शिक्षा सदन प्रतियोगिताबाट बाहिरिएको छ । इन्द्रेणी र टीकाभैरबमध्ये एक स्कूलको अर्को चरणमा जाने सम्भावना कायमै छ ।
नगरपालिकाभित्रका १७ वटा विद्यालयको सहभागिता रहेको प्रतियोगिता लिग कम नकआउट आधारमा खेलाइनेछ । हरेक समूहका शीर्ष २ टोली क्वाटरफाइनलमा प्रवेश गर्ने छन् ।
बुधबार समूह चरणका बाँकी खेल र क्वाटरफाइनलका खेलहरु हुनेछन् । प्रतियोगिताको विजेताले नगद ५० हजार प्राप्त गर्दा उप विजेताले २५ हजार पाउने छ ।
